حوار ساخن جدا مع الكابتن منفوخ فرج طبعا غنى عن التعريف

الحلقه تبدا بالمقدم الهمام المنفوخ((مصارع سابق))وهو يبتسم بالنضاره اياها بتاعت كل مره وخلفه صور له وهو ايام شبابه الغض وهو يجندل ويشندل ابطال العالم فى المصارعه(صوره وهو بيضرب بس مش وهوا بينضرب ) وقدامه طبعا الحزام منفوخ زيه برضه
يبتسم الكابتن منفوخ قائلا وهوبيعدل النضاره الروشه
- مساء الخير واهلا بيكم فى برنامجكم المفضل مصارعه المنحرفين النهارده معانا حلقه طحن كلها دم وانحراف وضرب وكهربا وجنازير انا جبتلكم شريط اخرمباراه لكين مع اخوه الحانوتى بعد ما تعاركو مع بعض لما ابو كين طلق ام الحانوتى وطبعا الحانوتى ماعجبوش رميه امه فى الشارع فقرر يرد شرف امه على الحلبه ويضرب كين بعد ماخلع القناع زى تينا بتاعت جادش
يقاطعه صوت التليفون فيرد كابتن منفوخ:
- ومعاااايا احمد من القاهره .. ازيك يابو حميد عامل ايه؟
- المشاهد ازيك انت ياكابتن منفوخ والنبى ياكابتن انا عايز اسال سؤال محيرنى هو صحيح ((ريتا)) فرقعت ((تريبل اتش)) وماشيه اليومين دول مع ابن المشمومه ده اللى اسمه(( الروك))؟؟
وصحيح ان تريبل اتش ظبطتهم مع بعض وللا ايه؟؟ والنبى يا كابتن تجاوب على سؤالى اصل انا مش عارف انام الليل بسبب الموضوع ده!!
- كابتن منفوخ: بص يابو حميد هو انا لما كلمت الروك فى الموضوع ده قاللى ان الموضوع اتفهم غلط لان تريبل اتش لما دخل عليهم ولقاهم نايمين مع بعض ماكنوش بيعملوا حاجه وحشه لا سمح الله ده كان(( الروك)) ساعتها عامل حركه دى دى تى من ورا ل ((ريتا)) وعلى خوانه والله ياجماعه .. لكن تريبل اتش فهم الموضوع غلط وافتكر انهم ((استغفر الله العظيم)) ولما ريتا عرفت انه بيشك فيها كرامتها(( نقحت ))عليها وقررت تسيبه لانها مابتحبش حد يخونها او يشك فى سلوكها وعفتها لا سمح الله.. وبعدين يابو حميد دىاعراض ناس واحنا مابنحبش نجيب فى سيره الناس وهما مش موجودين.. عيب عليك ياخى دول ولايا برضه.. وربنا امر بالستر..
- ياكابتن
- مع السلامه يابو حميد ونرجع تانى للماتش اللى معانا بتاع كين والحانوتى ونقول ان ...
يقا طعه صوت تليفون فيرد :
- ومعااانا الحاجه(( بخاطرها)) من العباسيه ازيك ياحاجه
- ازيك ياكابتن منفوخ .. والله احنا بنحبك قوى قوى ياكابتن وبنحب نشوفك منور الشاشه كده على طول وبنحب قوى الافلام الهندى اللى بتعرضها لنا فى برنامجك ده
- ربنا يخليكى ياحاجه
- معايا ابن بنت بنتى اسمه ((شمشون)) وهو بيحبك قوى ياكابتن وعايز يكلمك
شمشون ياخد دوره
-والنبى ياكابتن انا عايز اشوف الماتش بتاع(( البيج شوز)) لما ضرب ((كيرت انجل)) بالكرسى وكهربه وسيح دم اللى جابوه على الحلبه اصلى متغاظ قوى من كيرت انجل ده اللى مستصيع نفسه وشايف نفسه على الحلبه!
- عينيه ليك يابو حميد
-اسمى شمشون ياكابتن وفى كى جى وان
- مع السلامه يابو حميد ونرجع تانى للماتش بتاع كين واخوه..... يقاطعه صوت التليفون فيرد:
ومعانا الحج درديرى ابو باتيستا من الصعيد الجوانى.. ازيك يابو حميد!!!
- والنبى يااستاذ ملووح كنت عايز اسالك سؤال ربنا مايوقعك فى ضيقه ياخال الواد ((هوجان)) ولد اختى البعيده الهى مايشوف يوم عدل فى حياته السوده قرالى فى الجرنان ان(( باتيستا ))طلع اصلا من الصعيد وان اصل ابوه من عيله(( العجاينه)) اللى حدانا فى البلد واحنا كنا فاكرينه من العيله بتاعتنا ودلوقتى فىمشكله مولعه عندينا فى البلد.. ورجاله العيلتين نازلين فى بعض ((مانشيتات)) و((سوبليكسات)) و ((دى دى تى)) طول النهار وماحدش عارف يلمهم.. وامبارح الواد(( عوضين )) اللى من عيله العجاينه هددنى انه يعملى(( تثبيت اكتاف)) من الوضع راقدا لوماعترفتش ان باتيستا من العيله بتاعتهم ومش عارفين نعمل ايه دلوقتى ؟! يعنى يرضيك انى اعمل له(( فينيش كين)) واخلص منه.. وفى الاخر قلنا نستشير حضرتك .. فشور علينا يا خال ربنا ياخدك انت والمصارعين اللى بتجيبهم لينا.
- كابتن منفوخ(( بذكاء)) : الظاهر ان فيه عطل فى التليفون وقناه الافلام دخلت على قناه الرياضه .. وعموما اناحاتصل ببتيستا واشوف الموضوع ده ..
ومعانا تليفون تانى من(( حسونة ابو جهل)) ونقوله ازيك يابو حميد!!
- حسونه : والنبى ياكابتن فيه موضوع محيرنى..الناس بيقولوا ان الواد(( باتيستا)) اعلن اسلامه علشان لقى دراعه اليمين مكتوب عليه ((صلوا على النبي)) والدراع التانى مكتوب عليه((حصوه فى عين اللى مايصلى علىالنبى)) ايه حكايه الموضوع ده ياكابتن عشان محير الناس عندنا؟
- كابتن ((منفوخ)) بزهق: ح ابقى اتصل بباتيستا ونشوف الموضوع ده مع بعض .. مع السلامه يابو حميد.. ودلوقتى اعزائى المشاهدين استعدوا للطحن كله.. ماتش كين والحانوتى .. كل واحد يجيب عياله وقرايبه وجيرانه عشان الكل يتفرج ويشوف الضرب على اصوله والدم وهو بيسيح ويجرى .. بس اللى معاه مطوه ياريت يخليها مؤقتا فى جيبه وما يطلعهاش وهوا بيتفرج.. يبقى يطلعها بعد الماتش .. ودلوقتى..
يقاطعه جرس التليفون فيرد: ومعانا اخرتليفون قبل الماتش من الشيخ ((عبود..عبود..)) ..ازيك يابو جميد!!
- المشاهد: لوسمحت ياكابتن(( شمروخ)) هو اللى يعمل حركه ((هاف سلام)) وهو متوضى يتنقض وضوءه ولا لأه ؟؟
- السؤال ده تساله للشيخ ((عطوه حركات )) على القناه اللى جنبنا طوالى على ايدك الشمال ..مع 1000 سلامه ياعم الشيخ ربنا يسهلك..
يواجه المشاهدين بابتسامته قائلا:
- ودلوقتى بقى نسمع الماتش بتاع كين واخ.....
تنتقل الكاميرا الى احدىالحارات الشعبيه لنقل عركه اليوم بين ((سيد ابو عضمه)) الشهير بكين واخوه ((حوده ترابيس)) الشهير بالحانوتى وحواليهم ناس كتير ماسكين سواطير وسيوف وسنج وشوم فى انتظار ادوارهم والى لقاء اخر فى حلقه جديده من برنامج ((مصارعه المنحرفين)).. منحرفين بجد يعنى ... اى خدمه ياجدعان!!

جااااااااااااااااااااااااااااااااااااااااااااااااااااااااااااامد يا شيروووووووووووووووو

بجد تحفة الراجل دة

شغل جااااااامد مووووووووت Very Happy

:lol:

اية الجمااااااااااااااااااااااااال دة يا شيرووووووو

والله يا جماعة بتحرجونى بكلامكم ده

بلاش تحرجونى والنبى

والنبى

والنبى

كفاية اتنين جنيه من كل واحد فيكم

ههههههههههههههههههههههههههههه

ايه ده ؟؟؟؟؟؟؟؟؟؟؟

نفضتوا لى لما لقيتوا الموضوع فيه اتنين جنيه ؟؟؟؟؟؟؟؟

طب والله لاخدهم منكم اتاوة

جميل جدااااا يااااا باشا
بس الله يخليك بلاش الاتاوة دي

الله ينور عليك يا بشمهندس
كان الاستاذ منفوخ فى قمة التميز انهردة
هو ام الحانوتى لسة فى الشارع ولا اية النظام

هههههههههههههههههههههههه

هو انت متفرجتش على الماتش ده يا زيكو ؟؟؟؟؟؟؟؟؟

ياااااااااااااااااااااااا راااااااااااااااااجل

ده كان فى الأربعين .......... تحت بيتكم

أكيد الحلقة دى مسجلة بس الموضوع رائع شكرا
هههههههههههههههههههههههههههههههههههههههه

ميرسى يا مصطفى لمرورك الجميل

بارك الله فيك

» برنامج الوجه الاخر مع الكابتن احمد شوبير .. ضيف الحلقه النجم " احمد عز " بحجم 107 ميجا ... حوار شيق جدا
» مسلسل الكابتن ماجد
» وصفه هائله لراحه النفسيه + القران الكريم طبعا
» شاهد جميع أهداف الأسبوع 23 من الدورى العام المصرى "اسبوع ساخن جداً"
» فوائد اللاب توب ....بعد ما يبوظ طبعا "بالصور"