sherooo
مدير عام المنتدى
الجنس : ذكر
المتصفح المفضل : 
العمر : 46
تاريخ التسجيل : 29/10/2007
عدد الرسائل : 3139
 |  موضوع: المدرس - لأحمد فؤاد نجم  الأحد أبريل 19, 2009 1:15 am | |
| تذكير بمساهمة فاتح الموضوع :* أحمد أفندى محمد حامد عبد العال
صاحب عيلة جسيمة مراته وست عيال
عنده إسم الله حسن وحسين وسعيد ونوال
والمقروصة نفيسة وقدم الخير البت وصال
* أحمد افندى مدرس عربى قديم ومتين
شكله تشوفه تقول على طول من أهل الدين
شايل سبحة خشب البندق م الغاليين
ساعة تلف يمين وسواعى تلف شمال
* غير السبحة طالعة زبيبة فى قورته كمان
يعنى دليل على إنه بيسجد للرحمن
هيبة وتقوى ومظهر ناطق بالإيمان
ثم المشية عليها القيمة وفيها جلال
*أحمد أفندى ساكن شقة فى رابع دور
بيت الحاج عويس مراته الحاجة بدور
كانوا حبايب قبل ما يتأتى المقدور
ساعة نحس إتقلب البيت وإتبدل الحال
* إبن الحاج عويس كان عامل كورة شراب
والعصرية نازل يلعب جنب الباب
جاى بيشوط قام طارت فردة من القبقاب
جت فى زبيبة أحمد افندى ودمها سال
*ضحكت عيشة مرات السقا وقالت يوووه
ظاطوا عيال الحارة وقالوا الجردل أهوه
أحمد أفندى فوت عقله ما بقاش له
رقع الواد قلمين سخنين كومه فى الحال
* صرخت نوسة مرات محمود عبد الجواد
كبدى يا خويا يا ناس الراجل قتل الواد
نزل السيد سالم يجرى وقال يا ولاد
إوعوا الراجل يفلت منكو دا موته حلال
* أحمد أفندى زعق من تحت وقال : يا حسين
هات سكينة ونزل أخوك ومعاك شومتين
نزلوا العيلة إشتغل الضرب شمال ويمين
والصوت لعلع والنبابيت غنت موال
* خش محمد مرسى يخلص فى الموضوع
خد سكينة فى جنبه وكان عيان موجوع
نزل الأرض يئن وعينه تشر دموع
هى ثوانى وروحه طلعت للمتعال
*هاجوا العالم والنسوان رقعت بالصوت
و أمه تقول يا حبيبى إزاى دهولك الموت ؟
وأحمد أفندى لم عياله وعلى برغوت
طلب النجده من تليفون عبده البقال
* وجت النجده لقت حوالين الجثة إتنين
أخته بتلطم وأمه بتتمرمغ فى الطين
سأل الظابط فين أمال المتخانقين ؟؟
قالت نوسة من شباكها ده أبو وصال
* طلعت هجمة إن شالله ما حد يشوفها يا ناس
رزعوا الباب فشخوه اتنين طار الترباس
خبط الحلة قلبها وساح منها القلقاس
عاص القلة ولغمط وش البت نوال
* أحمد أفندى وقف على حيله وقال: جرى إيه ؟؟
إنت إزاى تتهجم كده على بيتى يا بيه ؟؟
لاشه الظابط جروا عياله وخافوا عليه
حسن إترمى على ابوه وإتشعلق فيه البت وصال
* أمر الظابط للشرطية بالتفتيش
واللى هيعتر فى السكينة هيبقى شاويش
بعد ما لفوا إوضها وداخوا قالوا مفيش
لمح الظابط دم مبقع جنب شوال
* زغد المخبر قال له : إزاى بتقول فتشت ؟؟
جرى من خوفه إتكعبل كوع جنب الطشت
لحقه زميله وقال : جرى ايه ؟؟ مالك ضبشت ؟؟
تيس قام مش قادر حتى يرد سؤال
* مخبر تانى عشان موعود يترقى شاويش
فرد المطوة وهم يمزع بيها الخيش
أول خبطه إتخض وقال : يا خبر !! ده حشيش
أحمد أفندى وقع من طوله فشر تمثال
* كانت نزلة إن شالله ما حد يشوفها ياهووووه
أحمد أفندى قفاه من حيل الضرب هروه
أربعة عسكر شالوه وفى قلب البوكس رموه
وأم عياله تقول له : يا سبع البيت يا غزال
* ضحكت عيشه مرات السقا وقالت : يووه
ظاطوا عيال الحارة وقالوا : المجرم أهوه
أحمد أفندى فوت عقله ما بقاش له
صار يلطم على وشه وقال : حبسونى عيال | |
|
