مش هبدأ بكلام ورغى وكده
لا انا هبدأ موضوعى بمشهد واحد لسه شايفاه من يومين
والمشهد ده بيضم معظم المشاهد اللى بيحصل فيها كده
لما روحت عند جدتى من يومين لقيت فى فرح فى الشارع
قولت شئ جميل يالا الواحد يتفرج ويسلى نفسه
الفرح اشتغل .. اغانى .. الشباب بيرقص .. والبنات بتصقف
وبعد كده ايه اللى حصل يا الاء ؟؟
البنات مسكتوش ازاى الشباب يرقصوا وهما لا
البنات اتكاتفوا واصروا ان الفرح مش هيخلص الا لما يثبتوا ان رقص البنات فى المقدمه دايما والحمد لله
اول بنوته رقصت كانت لابسه (( حجاااااااااب ))) مغطيه بيه شعرها ودخلت واديتها وصله رقص تماااااام
البنت اللى كانت بتصقفلها اضايقت .. ازاى البنت دى ترقص وهى لا .. قامت دخلت معاها فى وصله الرقص بتاعتها (( والاتنين كده محجبات )) قولت يا خساره على حجاب اسلامنا
المهم .. شويه شويه ولقيت بنات الفرح كلهم نزلوا رقص بقى وايه بيتنافسوا واحلى حاجه
كل ده وانا مستغربه وعماله اقول لاحول ولاقوه الا بالله
المهم شويه ولقيت ايه
لقيت واحده كبيره يعنى ام بنت من البنات اللى بترقص والام دى لابسه عبايه محترمه واسعه
الام دى عملت ايه
نزلت رقصت مع بنتها وكانت بتشد بنتها عشان ترقص اكتر واكتر !!
طيب كده البنات دخلوا فى بعضيهم ومش باينين
قامت بنوته من اللى بترقص جابت كرسى ووقفت عليه ترقص عشان تبقى ظاهره يعنى !!!
وحلقه البنات بقت تمشى شويه شويه لغايه ما وصلوا عند مكان الرجاله
وطبعا الشباب عينيهم اتسمرت قدام البنات
والبنت بقى واقفه على الكرسى ومدياها رقص تماااام ع الاخر !!!!
المشهد ده هو اللى حصل قدامى ... ويشهد ربى ان كل كلمه قولتها كانت حق وصدق
دلوقتى بقى عايزه اوجهلكم سؤال وياريت تقنعونى بالاجابه
ليه البنوته المحجبه اللى ربنا خلاها لؤلؤه
تتنازل عن لقبها عشان فرح
عشان تنزل تهز وسطها قدام شباب كتييييييييير
ومش بعيد حد يصورها فيديو
ليه ؟؟... هل الفرح ده شئ مقدس مش بتجرى عليه قيمنا ؟؟؟
والام اللى نزلت رقصت دى مش كده عيب ؟؟!!
بدل ماتقول لبنتها انها تقعد ومترقصش تقوم مشجعاها على كده ؟؟؟!!
فين ديننا فى كل ده ..
ياريت تشاركونى وتعرضوا رأيكم ..